jis simt bhi dekhuun nazar aataa hai ke tum ho
ai jaan-e-jahaan ye koi tum saa hai ke tum ho
ye Khvaab hai Khushbuu hai ke jhonkaa hai ke pal hai
ye dhundh hai baadal hai ke saayaa hai ke tum ho
is did ki sa_aat mein kai rang hain larazaan
main huun ke koi aur hai duniyaa hai ke tum ho
dekho ye kisi aur ki aankhen hain ke meri
dekhuun ye kisi aur kaa cheharaa hai ke tum ho
ye umr-e-gurezaan kahin Thahare to ye jaanuun
har saans mein mujh ko ye lagataa hai ke tum ho
har bazm mein mauzuu-e-suKhan dil zad_gaan kaa
ab kaun hai shirin hai ke lailaa hai ke tum ho
ik dard kaa phailaa huaa saharaa hai ke main huun
ik mauj mein aayaa huaa dariya hai ke tum ho
vo vaqt na aaye ke dil-e-zaar bhi soche
is shahar mein tanhaa koi ham saa hai ke tum ho
aabaad ham aashuftaa saron se nahin maqtal
ye rasm abhi shahar mein zindaa hai ke tum ho
ai jaan-e-'shadab' itani bhi taufiq kise thi
ham ko Gam-e-hasti bhi gavaaraa hai ke tum ho
