mujhe khud se mohabbat hai
mohabbat bhi kuch aisi
jo kisi sehraa ko baarish se
ke baarish jis qadar bhi toot ker barse
zara pal bhar ko pyaasi rait ke lab bheeg jate hein
magar bas ik zara pal bhar
mujhe khud se mohabbat hai
mohabbat bhi kuch aisi
jo parindon ko fazaa'on se
gulon ko khushboo'on se
manzaron ko lehla'atay moasamon se
jis mein choonay, jazb rakhnay, aur galay mil ke hamesha muskuranay ke liye
dil chahaton aur khwahishon ki sab hadon ko paar ker jaye
mujhe khud se mohabbat hai magar
itni nahin jitni mere sodaii ko mujh se
woh apne raat aur din, dhoop chaoon, saahilon, daryaa kinaron ko
faqat ik mere nuqtay mein samaite
aur meri chahaton mein
aankh se dil, rooh se wajdaan ki har kaifiyet mein doobta, rota, ubharta, muskurata
zaat aur maarooz ke saare hawalon se kabhi ka kat chuka hai
aur mujhe us se mohabbat hai
mohabbat bhi kuch aisi
jo kisi sehraa ko baarish se........
