Gemini Horoscope برج جوزا

[Master Mind]

رج جوزا
دائرئہ بروج کا تیسرا برج اور ہوئی تکون کا پہلا اہم رکن برج جوزا ہے۔ اپنے نشان جڑواں بچوں کی طرح یہ دہرے پن اور دو رُخوں کا مظہر ہے، یعنی اپنی ماہیت میں ذوجسد پن، تغیر و تبدل، اس کا مزاج ہے۔ اپنی فطرت میں مثبت ہے۔ اعضائے جسمانی میں ہاتھ اور بازو اس سے متعلق ہیں، جب کہ اندرونی اعضا میں پھیپھڑے، انسانی سوچ اور دیگر ذہنی سرگرمیاں اس کے ماتحت ہیں۔ اس کا حاکم سیارہ عطارد منشی فلک کہلاتا ہے، لہٰذا تحریر و تقریر، پیغام رسانی، سفر اور رسل و رسائل، ذرائع ابلاغ ومواصلات پر اثرانداز ہوتا ہے۔

ثور اور جوزا کی حد اتصال
اگر آپ کی تاریخ پیدائش 19 مئی تا 24 مئی ہے تو آپ برج ثور اور برج جوزا کے سنگم پر پیدا ہوئے ہیں اور اس طرح دونوں برجوں کی خصوصیات کا دل چسپ امتزاج رکھتے ہیں۔ اس سنگم پر پیدا ہونے والے افراد کو سدابہار کہا جا سکتا ہے۔ وہ طاقت ور، قائل کرنے والے اور زرخیز ہوتے ہیں۔ وہ جو کچھ بھی کریں، بے تحاشا کرنا چاہتے ہیں لیکن ثور اور جوزا کی حد اتصال شخصیت میں تضادات بھی پیدا کرتی ہے، جس کی وجہ ثور اور جوزا کے عناصر کا اختلاف ہے۔ اس سنگم پر ثور کی خاکی خصوصیات جوزا کی ہوائی خصوصیات سے جڑی ہوئی ہیں اور یہ تضاد جسم اور دماغ کے مابین پے چیدہ مسائل پیدا کر سکتا ہے۔ شاید اسی وجہ سے ان لوگوں میں مخصوص جذبات انگیز حس کا فقدان ہوتا ہے اور وہ اپنی جبلت پر بھروسا بھی نہیں کرتے ہیں۔ یہی وجہ ہے کہ وہ جذباتی معاملات میں حد سے زیادہ گڑبڑا جاتے ہیں یا دوسروں کے جذبات اور احساسات کی طرف سے حددرجہ بے حس اور سردمہر نظر آتے ہیں۔ اگر وہ نظم و ضبط کو فروغ دیں اور اپنی اہلیت و استعداد کا درست استعمال کریں تو پائیدار کامیابی حاصل کر سکتے ہیں۔ انہیں چاہیے کہ وہ اپنے آپ کو محدود رکھیں اور زیادہ شعبوں میں ٹانگ نہ اڑائیں، بلکہ کسی ایک ہی شعبے میں مہارت حاصل کرنے پر دھیان دیں۔

جوزا شخصیت اور کردار
برج جوزا کا نشان جڑواں بچے ہیں۔ یہ نشان کسی جوزا شخصیت کے دہرے پن کی نشان دہی کرتا ہے۔ جوزا کا عنصر ہوا ہے، جس سے اظہار ذات کی نشان دہی ہوتی ہے۔
جوزا افراد بڑی آسانی سے لوگوں کو اپنا دوست بنانے کی صلاحیت رکھتے ہیں۔ غیرمعمولی ہمہ گیری اور دانش ورانہ تجسس، زبردست ذہنی استعداد اور اثرآفرینی جوزا افراد کی شخصیت کا خاصا ہے۔ ان لوگوں میں بلا کی ذہنی توانائی موجود ہوتی ہے۔ ایک جوزا شخصیت اور کردار کی مکمل طور پر تشریح کرنا کوئی آسان کام نہیں۔ اس کی وجہ ان کی شخصیت کا دہراپن ہے۔ ان لوگوں میں بیک وقت وفاداری اور متلون مزاجی، خلوص و محبت اور ہوشیاری، وفا اور جفا موجود ہو سکتی ہیں۔ یہ تبدیلی پسند کرتے ہیں اور نئے منصوبوں کے بارے میں سوچتے رہتے ہیں۔
برج جوزا کا حاکم سیارہ عطارد پیغام رساں کہلاتا ہے، اسی لیے جوزا افراد کی شخصیت و کردار میں تیزفہمی، سبک رفتاری اور بے باکی پائی جاتی ہے۔ وہ فوراً کسی کام کو یا صورت حال کو سمجھ لیتے ہیں تاہم استقامت کے سخت فقدان کا شکار ہوتے ہیں اور ایک غیرمستقل مزاجی کی کیفیت ان کی شخصیت کا حصہ بنی رہتی ہے۔ اسی طرح یہ لوگ اکثر کسی کام کے آغاز پر جس قدر پُرجوش نظر آتے ہیں، اس کے اختتام پر عموماً منظر سے غائب ہو چکے ہوتے ہیں۔ سفر اور اسپورٹس ان کے لیے بے حد ضروری ہیں۔ رابطہ اور میل جول ان کی زندگی کے جوہر ہیں۔ تنہائی اور اکیلے پن کو یہ برداشت نہیں کر سکتے۔ کسی بھی مقابلے یا بازی کی سنسنی خیزی سے خوب لطف اندوز ہوتے ہیں۔ آزادی سے خرچ کرتے ہیں اور اکثر فوری نوعیت کے کاموں کی طرف جلد راغب ہوتے ہیں۔ کسی کام کو شروع کرنے کے بعد ایک لمبے عرصے تک نتائج کے انتظار میں صبر و سکون سے بیٹھناان کے بس کی بات نہیں۔جوزا افراد کی حس مزاح اور تفریح پسندی کی عادت ہمیشہ عروج پر رہتی ہے۔ یہ اپنے حلقہ احباب میں ہمیشہ چہکتے ہوئے نظر آئیں گے۔ ان لوگوں کو ہر صورت میں مستقل مزاجی پر توجہ دینا چاہیے۔

جوزا کا عشرہ اوّل
اگر آپ برج جوزا کے تحت 25 مئی سے 2 جون تک پیدا ہوئے ہیں تو آپ کا تعلق جوزا کے عشرئہ اوّل سے ہے اور آپ دہرے عطاری اثرات کے حامل ہیں۔ اس عرصے میں پیدا ہونے والے جوزا افراد جنگجویانہ فطرت رکھتے ہیں۔ وہ اپنے جس موقف کو درست سمجھتے ہیں، اس پر ڈٹ جاتے ہیں، خواہ یہ موقف غلط ہی کیوں نہ ہو اور اسے منوانے کے لیے انہیں کتنی ہی مخالفت اور دشمنی مول لینا پڑے۔ یہ لوگ عمل کی آزادی اور سوچ کی آزادی پر گہرا یقین رکھتے ہیں، لہٰذا معاشرے کے ٹھکرائے ہوئے بے بس اور مجبور لوگوں کو ناصرف تحفظ فراہم کرنا چاہتے ہیں بلکہ ان کا استحصال کرنے والوں سے انہیں نجات بھی دلانا چاہتے ہیں۔یہ لوگ ہمیشہ متحرک نظر آتے ہیں اور اپنا وقت ضائع نہیں کرتے۔ اگر کوئی ان کی بات یا ان کا موقف نہیں سمجھ سکتا تو یہ اس کا مسئلہ ہے۔ یہ اسے چھوڑ کر تیزی سے آگے بڑھ جائیں گے۔ غیرمعمولی ذہنی توانائی، مہمان نوازی اور خودانحصاری ان کی شخصیت کے نمایاں وصف ہیں۔ یہ لوگ اعلیٰ مقاصد اور فنون لطیفہ میں بہت شان دار کارکردگی کا مظاہرہ کر سکتے ہیں۔ ان کا تیزی سے سوچنے کا عمل ان کی بے پناہ سرگرمیوں کی عکاسی کرتا ہے مگر ان کی سوچ بہت تیزی سے بدلتی ہے اور وہ ایک منصوبے سے دوسرے منصوبے تک چھلانگ لگانے میں کوئی تاخیر نہیں کرتے، لہٰذا اکثر اپنے پیچھے نامکمل منصوبوں کی ایک لمبی قطار چھوڑ جاتے ہیں۔ درحقیقت عمر کے ابتدائی حصے میں جو چیزیں انہیں بوجھ اور بندش لگتی ہیں، وہی مستقبل میںا ن کی ترقی اور کامیابی کے لیے ضروری ہوتی ہیں مگر اکثر یہ انہی ذمے داریوں کو پورا کیے بغیر کچھ دوسری اوٹ پٹانگ سرگرمیوں میں ملوث ہو کر اپنے آپ کو ضائع کر سکتے ہیں اور ابتدائی عمر میں ان لوگوں کو بہت زیادہ ذمے دارانہ رویوں کا مظاہرہ کرنا چاہیے۔ انہیں چاہیے کہ جو کام شروع کریں، اسے پایہ تکمیل تک ضرور پہنچائیں۔ دوسروں سے میل ملاقات میں صبر و تحمل پیدا کریں۔ اس عشرے میں پیدا ہونے والی چند مشہور شخصیات یہ ہیں: امریکی صدر جان ایف کینیڈی، شہرئہ آفاق فلمی اداکارہ مارلن منرو، مشہور امریکی وزیر خارجہ ہنری کسنجر، شہرئہ آفاق ادیب تھامس ہارڈی، حال ہی میں اکیڈمی ایوارڈ حاصل کرنے والے فلمی اداکار کلینٹ ایسٹ وڈ، مشہور اداکارہ بروک شیلڈ وغیرہ۔

جوزا کا عشر ہ دوم
اگر آپ کی تاریخ پیدائش 3 جون سے 10 جون تک ہے تو آپ برج جوزا کے دوسرے عشرے سے تعلق رکھتے ہیں، جس پر سیارہ زہرہ اثر انداز ہے اور اس طرح آپ کی شخصیت سیارہ عطارد اور زہرہ کے اثرات کا حسین امتزاج پیش کرتی ہے۔عشرئہ دوم کے تحت آپ ایک ٹھوس طریقہ اظہار کے مالک ہیں اور حقیقت کو پوشیدہ رکھنا پسند نہیں کرتے۔ آپ کو دوسروں سے داد وصول کر کے بے حد طمانیت حاصل ہوتی ہے۔ ممکن ہے آپ یہ بھی محسوس کرتے ہوں کہ دوسرے آپ کی بات درست طور پر نہیں سمجھ رہے، اس کی وجہ یہ ہوتی ہے کہ آپ وہ طریقہ اظہار اختیار کرتے ہیں جو دوسروں کے لیے مشکل یا مبہم ہو سکتا ہے۔ اگر یہ کہا جائے تو غلط نہ ہوگا کہ آپ بہت منہ پھٹ ہیں، خوشامد اور چاپلوسی آپ کو نہیں آتی، فقرے چست کرنا یا طنزیہ گفتگو آپ کا محبوب مشغلہ ہے۔ اس سلسلے میں آپ خود کو بھی معاف نہیں کرتے، بحث و مباحثہ اورمناظرے بازی آپ کو پسند ہے اور اس حوالے سے آپ اپنا مخصوص موقف اور طرز استدلال رکھتے ہیں۔ صنف مخالف کو اپنی طرف متوجہ کرنے کے سارے گر آپ جانتے ہیں۔ آپ ہر میدان میں کامیابی اور فتح کا جھنڈا لہرانا چاہتے ہیں۔ آپ کا ایک مسئلہ یہ بھی ہے کہ آپ کو نظرانداز کیا جاتا ہے یا سنجیدگی سے نہیں لیا جاتا۔ بہرحال یہ طے ہے کہ آپ ایک کھلے دل، کھلے ذہن اور کھلے ہاتھ سے خرچ کرنے والے انسان ہیں۔

جوزا کا عشرہ سوم
اگر آپ کی تاریخ پیدائش 11 جون سے 18 جون تک ہے تو آپ برج جوزا کے تیسرے عشرے میں پیدا ہوئے ہیں۔ یہ عشرہ سیارہ یورینس کے زیراثر ہے، لہٰذا آپ کے اندر جدت و ایجاد پسندی کے ساتھ تھوڑی سی سختی بھی پائی جاتی ہے۔ آپ حیرت انگیز کامیابیاں حاصل کرنے کے اہل ہیں لیکن آپانسانی سوچ کو بھی برقرار رکھتے ہیں۔ اگرچہ یہ عشرہ موجدین کا ہے لیکن نفسیات بھی آپ کے لیے مناسب پیشہ ہے۔ اس عشرے کا مرکزی تصور ”متلاشی“ ہے۔ عشرئہ سوم کے عشرے میں پیدا ہونے والے افراد دلیر، مہم جو اور طالع آزما ہوتے ہیں۔ وہ اس بات کے لیے کوشاںر ہتے ہیں کہ کون و مکاں کی حدود و قیود سے آگے نکل جائیں۔ یہ لوگ جسمانی سرگرمیاں اور نگ رلیوں سے خوب لطف اندوز ہوتے ہیں۔ بے چین فطرت کے حامل سیماب صفت جوزا عشرئہ سوم کے افراد اپنی نجی زندگی میں متواتر متحرک رہتے ہیں۔ وہ جگہ، کاروبار، کیرئیر اور دوست بدلتے رہتے ہیں۔ یہ لوگ جتنی آسانی اور سہولت سے اپنا کاروبار چلاتے ہیں، اتنی ہی آسانی سے اپنا گھر بھی چلاتے ہیں۔

ایک نظر میں مثبت اور منفی خصوصیات
جوزا شخصیت اپنے مثبت پہلوﺅں میں حاضر جواب، ہنس مکھ، ہمہ گیر، ذہین، پُرجوش، مصلحت اندیش، موقع شناس، زندہ دل اور خوش مزاج ہوتی ہے جب کہ اس کے منفی پہلو یہ ہیں: قوت فیصلہ کا فقدان، بے ڈھنگاپن، خودپسند، بے پروا، بے تعلق، جلد بدل جانے والا، فضول گو، آوارگی پسند، ہرجائی۔

جوزا شوہر
بحیثیت شوہر جوزا مرد ایک ایسی شریک حیات چاہتا ہے جو اس کے ذہنی اور جسمانی مشاغل میں اس کا ساتھ دے سکے اور ضروریات سے زیادہ گھریلو ماحول کی پابندی ہو کر نہ رہ جائے۔ وہ جتنی مرتبہ فرمائش کرے، وہ اتنی ہی مرتبہ گھر کا ماحول تبدیل کرنے کے لیے آمادہ ہوجائے۔ ایک غلبہ پسند عورت جوزا شوہر کے لیے مناسب نہیں ہوتی، کیوں کہ عموماً جوزا افراد کی گھریلو زندگی برائے نام ہوتی ہے۔ جوزا مرد دوسری عورتوں سے ہنسی مذاق کرنے کا عادی ہوتا ہے لیکن اس کی ذہنی آوارہ گردی کو سنجیدگی سے نہیں لینا چاہیے۔
درحقیقت جوزا مرد میں بہت زیادہ سمجھ بوجھ ہوتی ہے اور ان سے زیادہ کوئی اور مرد رومانوی کردار ادا نہیں کر سکتا۔ اگر جوزا مرد کو ایک ایسی شریک حیات مل جائے جو اس کے خاندانی تصورات کو حقیقت بنا دے اور اس کے ساتھ دنگا فساد نہ کرے تو اس کی شادی بڑی کامیاب رہے گی۔ یہ لوگ اپنے احساس کم تری کو چھپانے کے لیے صرف دکھاوے کا رعب جماتے ہیں۔ گھریلو زندگی میں جوزا شوہر کا رویہ تھوڑا سا تنقیدی ہوتا ہے اور وہ چاہتے ہیں کہ ہر کام ان کی مرضی کے مطابق ہی ہونا چاہیے لیکن جب حالات ان کی مرضی کے خلاف جار ہے ہوں تو یہ ہنگامہ برپا کر دیتے ہیں۔ زندگی کی یکسانیت سے یہ لوگ نفرت کرتے ہیں۔ اگرچہ یہ لوگ اپنے بچوں سے بڑی محبت کرتے ہیں لیکن اس کے باوجود ان کے ساتھ سخت رویہ اختیار کرتے ہیں۔

جوزا بیوی
ایک بیوی کی حیثیت سے جوزا عورت بہترین اور دانش مند شریک حیات ثابت ہوتی ہے۔ اس کے لیے زیادہ پُرکشش چیز ذہنی رفاقت ہوتی ہے۔ اسے یہ احساس دلانا چاہیے کہ وہ رفیق حیات ہے،کوئی خادمہ نہیں ہے۔ جوزا عورت کے لیے ضروری ہے کہ شادی کے بعد بھی وہ گھر سے باہر بھی اپنی سرگرمیاں جاری رکھ سکے، لہٰذا ان کے شوہروں کو یہ شکایت ہو سکتی ہے کہ ان کی بیوی امورخانہ داری کو مناسب وقت نہیں دیتی ہیں۔ بہرحال اگر دونوں کے درمیان ہم آہنگی موجود ہے تو اس صورت حال پر قابو پایا جا سکتا ہے۔ بعض حالات میں یہ بھی ہوتا ہے کہ جوزا عورت اپنی بہترین صلاحیت سے کام لے کر اپنے گھر اور کیرئیر دونوں کے ساتھ بڑی خوش اسلوبی سے انصاف کرتی ہے۔ جوزا عورت اس بات پر بہت زور دیتی ہے کہ اپنے گھر کو کس طرح چلایا جائے۔ اگرچہ وہ دوسری بیویوں کی طرح زیادہ وقت اپنے گھر میں نہیں گزارتی لیکن یہ خواتین ذہین، شائستہ اور سلیقہ مند ہوتی ہیں اور بدنظمی برداشت نہیں کرتیں۔ وہ پُرکشش اور باخبر ہوتی ہیں اور اپنے شوہروں کے لیے مددگار ثابت ہو سکتی ہیں۔

جوزا باپ
ایک باپ کی حیثیت سے آپ کا زاویہ نگاہ آپ کے بچوں کی بہ نسبت زیادہ پختہ اور وسیع ہے، لہٰذا آپ کے اور آپ کی اولاد کے درمیان جنریشن گیپ یا ذہنی فاصلہ پیدا ہونے کا اندیشہ نہیں۔ آپ زمانے کے ساتھ ساتھ چلتے ہیں، خاص طور سے اپنے بچوں کے مستقبل اور ترقی کے معاملے پر آپ کی سوچ زمانے سے ہم آہنگ ہے۔ تاہم آپ حد سے زیادہ نکتہ چیں اور حاکمیت پسند ہوسکتے ہیں۔ بے جا مداخلت کے رجحان سے بچنے کی کوشش کریں۔

جوزا ماں
آپ کا شمار ان معدودے چند خواتین میں ہوتا ہے جو کسی پیشہ ورانہ مصروفیت کے تقاضوں کو پورا کرنے کے ساتھ ساتھ گھر اور بچوں کی ذمے داریاں پوری کرنے کی صلاحیت رکھتی ہیں، نیز چالاکیاور گھماﺅ پھراﺅ کی حیرت انگیز شعبدے بازی میں زبردست مہارت کا مظاہرہ کر سکتی ہیں۔ آپ کو دانش ورانہ تحریک کی ضرورت ہوتی ہے۔ اگرچہ آپ ایک بہترین ماں ہیں مگر صرف ماں بننے پر ہی قناعت نہیں کرتیں۔ آپ کی سب سے بڑی خامی ممکنہ شفقت کا فقدان ہو سکتی ہے۔ بہرحال آپ ترغیب و تحریک کے تحت گوناگوں سرگرمیوں میں حصہ لیتی ہیں اور تفریح کا سامان فراہم کرتی ہیں۔

برج جوزا کی محبت کے رنگ ڈھنگ
برج جوزا سے متعلق افراد(خواتین و مرد) متعدد معاشقوں، تعلقات حتیٰ کہ شادیوں کے سبب خاصی شہرت پاتے ہیں۔ ان لوگوں کو ایک ٹھوس بنیاد کی ضرورت ہوتی ہے اور انہیں یہ سمجھنا چاہیے کہ شادی کا مقصد محض تفریح نہیں بلکہ یہ ایک بھاری ذمے داری ہے۔ محبت کے معاملات میں یہ لوگ عارضی پینگیں بڑھانے اور خوشیاں بکھیرنے میں بہت عمدہ کارکردگی کا مظاہرہ کرتے ہیں لیکن پھر دل توڑنے میں بھی ان کا کوئی جواب نہیں ہے۔ ان کی مثال ایک ایسے شخص کی ہے جو ادھر اُدھر منہ اٹھائے پھرتا ہے اور کبھی چین سے نہیں بیٹھتا۔ جوزا افراد کی محبت یا تعلقات کے اسرار کو سمجھنا بڑا مشکل کام ہے۔ ان کا زاویہ نگاہ ہمیشہ ذہنی اور منطقی ہوتا ہے۔ گویا یہ محبت اور تعلقات میں دل سے نہیں بلکہ دماغ سے کام لیتے ہیں۔ شاید اسی وجہ سے ازدواجی تعلقات ان کے نزدیک ایک ثانوی حیثیت اختیار کر لیتے ہیں۔ اگرچہ یہ لوگ ایک مفروضہ آئیڈیل کے حصول کے لیے سرگرداں رہتے ہیں لیکن خرابی یہ ہے کہ ان کا وہ آئیڈیل بھی ان کے وقتی موڈ کے مطابق بدلتا رہتا ہے۔ ان لوگوں کی ذہنی قلابازیوں سے ان کے خیالات اور خواہشات میں بڑی تیزی سے تبدیلیاں رونما ہوتی رہتی ہیں۔ دوسرے لوگوں کی سست روی جوزا افراد کے لیے ہمیشہ ایک مسئلہ بنی رہتی ہے۔ ان کے شریکِ کار یا شریکِ حیات کے لیے ذہین اور چاق و چوبند ہونا لازمی ہے، بصورت دیگر روزانہ کوئی تنازع جنم لیتا رہے گا۔
یہ لوگ بیک وقت دو یا دو سے زائد جگہ عشق لڑانے کی صلاحیت رکھتے ہیں اور چاہتے ہیں کہ ہوا کے مانند آزاد رہیں۔ ان کے بارے میں کوئی پیش گوئی کرنا بہت مشکل ہوتا ہے۔ انہیں اپنے محبوب یا جیونساتھی کے انتخاب میں بڑی ہوشیاری سے کام لینا چاہیے۔ انہیں ایک ایسے ساتھی کی ضرورت ہوتی ہے جو مسلسل ان کی دل چسپیوں کو ابھارتا رہے، زندگی میں یکسانیت پیدا نہ ہونے دے۔

[Master Mind]

اور حمل کا ساتھ

یہ ہوا اور آگ کا ساتھ ہے اور عنصری طور پر موافق ہے۔ علم نجوم کے قواعد بھی اس کی تائید کرتے ہیں۔ حمل اورجوزا دونوں ہی حاضر جواب اور خوش طبع ہیں۔ دونوں تخلیقی صلاحیتوں کے مالک اور ایکبامقصد زندگی گزارنے کے خواہش مند ہیں۔ حمل دل کشی اور دل آویزی سے بھرپور ہے اورجوزا ذہانت، دلیری اور جرات مندی سے لبریز ہے، لہٰذا یہ رفاقت غضب کی کامیابی کا مظہر ہو سکتی ہے۔ دونوں کو دولت کے انبار لگانے اور زیادہ سے زیادہ طاقت اور اختیارات کا بوجھ لادنے کی عادت ہے۔ دونوں ایک جیسے لگتے اور اکثر ایک جیسی بچکانہ حرکتیں کرتے ہیں۔ ایمان داری ان کی پہچان ہے مگر کبھی کبھی جہاں ایمان داری ختم ہوتی ہے، وہیں سے خودفریبی شروع ہوتی ہے۔ اس تجزیے کا لب لباب یہ ہے کہ دونوں ہی دودھ اور شہد کی سرزمین گم گشتہ کی تلاش میں گم ہو سکتے ہیں۔

جوزا اور ثو رکا ساتھ

یہ ہوا اور مٹی کی شراکت عناصر کے اعتبار سے ناموافق ہے۔ علم نجوم کے قواعد کے مطابق یہ جڑواں برج ہیں لیکن اپنے مزاج اور فطرت میں ایک دوسرے سے قطعاً مختلف ہیں۔ جوزا اور ثور کی شراکت بہت سی مشکلات کا سبب ہوگی۔ ثور اکیلا خوش ہے اور بڑے سکون اور اطمینان سے گھاس کے اُگنے کا انتظار کر رہا ہے۔ اس کے لیے جوزا کی تیزرفتاری کا ساتھ دینا انتہائی مشکل ہے، جس کے لیے ہر دن عید اور ہر شب، شب برات ہے، جو رات رات بھر دوستوں کی محفل سجائے رہنا چاہتا ہے اور یہ مت بھولیں کہ یہ کبھی نہ تھکنے والا، دہری، توانا اور پُرجوش شخصیت کا مالک ہے۔ ثور کے لیے اس کا ساتھ دینا تقریباً ناممکن ہے۔ جوزا باتیں کرنا، بحث کرنا چاہتا ہے جب کہ ثور ہمیشہ خاموشی کو ترجیح دیتا ہے۔ جوزا لاتعلق اور الگ تھلگ ہواﺅں میں اُڑتا ہے اور ایک بادل سے دوسرے بادل پر بڑی آسانی اور مہارت سے چھلانگ لگاتا ہے۔ یہ کام بھاری بھرکم سانڈ کے لیے ممکن نہیں۔ وہ تغیراور تبدیلی سے بے زار ہوتا ہے۔ اسے تو صرف تھوڑا سا پیار، تھوڑا سا خلوص چاہیے۔ اکثر تو وہ پُرتپاک رویے سے ہی بہل جاتا ہے لیکن جوزا کے سامنے کوئی نیا منصوبہ ہر دم رہتا ہے، لہٰذا اس رفاقت کا نبھنا بڑا مشکل ہے۔

جوزا اور جوزا کا ساتھ

ایک ہی برج جوزا کے زیر اثر پیدا ہونے والے افراد اپنی بنیادی خصوصیات میں خاص مماثلت رکھتے ہیں۔ ان کی خوبیاں اور خامیاں مشترک ہیں۔ ان دونوں کا باہمی تعلق بڑا دل چسپ اور حیرت انگیز ہوگا۔ یہ دونوں ڈالی ڈالی چہکنے والے ایسے پرندے ہیں جو ابھی ساتھ ساتھ بیٹھے خوش گپیوں اور خوش فعلیوں میں مصروف نظر آئیں گے تو پلک جھپکنے کے دوران میں کوئی ایک کسی اور سمت میں پرواز کر چکا ہوگا اور ضروری نہیں ہے کہ دوسرا اس کا تعاقب کر رہا ہو، وہ فوراً کسی اور سمت میں پرواز کے لیے پرتول سکتا ہے اور پھر کسی بھی وقت دونوں اسی طرح یکجا نظر آسکتے ہیں۔ گویا جوزا اور جوزا کا ساتھ شروع ہو کر اچانک ختم اور ختم ہوکر اچانک پھر شروع اور پھر ختم.... یہ ابتدا اور اختتام کا ایک نہ ختم ہونے والا سلسلہ ہو سکتا ہے، جس میں دونوں کی ایک دوسرے سے دل چسپیاں اور بے زاریاں ساتھ ساتھ چلتی رہتی ہیں۔ خوش مزاج اور نت نئی دل چسپیوں کے دل دادہ جوزا کے لیے زندگی میں تغیر و تبدل بہت ضروری ہے۔ وہ یکساں حالات و واقعات اور ماحول کے جمود سے جلد اکتا جاتا ہے۔ دوستی یا ازدواجی زندگی میں بھی ہیجان خیزی اور کچھ نیاپن اس کے لیے ضروری ہے۔ وہ نئے تجربات کرنے کا عادی ہوتا ہے۔ دو جوزا افراد ایک دوسرے کی یہ ضرورت پوری کر سکتے ہیں، مگر دونوں اپنی پارہ مزاجی کے باعث بالآخر ایک دوسرے سے اکتانے لگیں گے اور وہ اپنے لیے کسی نئی دل چسپی کی تلاش شروع کر سکتے ہیں۔ بلاشبہ کسی جوزا شخصیت کی دل چسپی کا ایک مرکز پر قائم رکھنا ایک تنی ہوئی رسی پر چلنے کے مترادف ہے۔ دونوں کو ہر وقت ایک دوسرے کی مدد و تعاون کی ضرورت ہوگی مگر ساتھ ہی دونوں میں سے ہر ایک اپنے لیے مکمل آزادی کا بھی طلب گار ہوگا۔ جوزا اور جوزا کی رفاقت کے بارے میں قبل از وقت کچھ کہنا بڑا مشکل کام ہے۔ اگر ان میں سے کسی ایک کے انفرادی زائچے میں بھی سیارگان کی پوزیشن فطری استحکام اور مزاجی سنجیدگی ظاہر کر رہی ہو تو اس جوڑی کے دیرپا اور پائیدار ہونے کے امکان ہو سکتے ہیں۔

جوزا اور سرطان کا ساتھ

جوزا کا عنصر ہوا اور سرطان کا پانی ہے۔ دونوں عناصر کے درمیان کوئی تعلق خاص نہیں۔ علم نجوم کے قواعد کے مطابق یہ دونوں جڑواں بروج ہیں، یعنی سرطان، برج جوزا سے دوسرا اور جوزا برج سرطان سے بارہویں نمبر پر۔ سرطان شخصیت کے مثبت پہلو یہ ہیں: حساس، ہمدرد، پُراثر و موثر، وفادار، تخیلاتی۔ جب کہ اپنی منفی خصوصیات میں سرطان شخصیت تذبذب کا شکار، یاسیت پسند، احساس کم تری میں مبتلا، من موجی اور زودرنج ہوتی ہے۔ جوزا کی شوخیاں اور بلندپروازی سرطان کے لیے باعث کشش ہیں اور سرطان کا پُراسرار و تخیلاتی انداز جوزا کے لیے شوق تجسس کو ابھارتا ہے لیکن جب یہ دونوں یکجا ہو جائیں تو دونوں کے فطری اور مزاجی اختلافات نمایاں ہونے لگتے ہیں۔ جوزا گھر میں ٹک کر نہیں بیٹھ سکتا، اسے محفل محفل گھومنے اورلوگوں سے گفت و شنید میں لطف آتا ہے جب کہ سرطان گھر گھسنا اور اپنی دنیا میں مگن۔ دونوں کے درمیان بنیادی تضاد یہ ہے کہ سرطان احساس و جذبات کو زیادہ اہمیت دیتا ہے، جب کہ جوزا ذہن اور علم کو، لہٰذا دونوں دو مختلف منزلوں کے مسافر ہیں۔ ان کی رفاقت ہر روز ایک نیا مسئلہ کھڑ اکرے گی۔ سرطان سے یہ برداشت نہ ہوگا کہ اس کا جوزا ساتھی دوسروں سے مسکرا مسکرا کر خوش گفتاری کا مظاہرہ کرے اور اس کی موجودی سے ہی غافل ہو جائے۔ اسی طرح جوزا کبھی سرطان کی جذباتیت اور احساسات کو نہیں سمجھ پائے گا اور سرطان کی نظر میں غیر مخلص ٹھہرے گا۔ جوزا، سرطان کو ”بور“ قرار دے گا، خصوصاً اس کی یاسیت پسندی سے بے زار ہوگا۔ دونوں کے موڈ مزاج کا کچھ پتا نہیں کہ کب کیسا ہوگا۔ چناں چہ اسے ایک کامیاب تعلق نہیں کہا جا سکتا ہے۔

جوزا اور اسد کا ساتھ

جوزا کا عنصر ہوا اور اسد کا آگ ہے۔ دونوں ایک دوسرے کے لیے تقویت اور گرم جوشی کا باعث ہیں۔ علم نجوم کے قواعد کے مطابق بھی دونوں بروج کے درمیان موافقت کا زاویہ نظر موجود ہے۔ اسد شخصیت باوقار اور فراخ دل، وفادار اور مہربان، گرم جوش، خودشناس، اونچے خیالات و مزاجی کی حامل ہوتی ہے۔ اس کے منفی پہلوﺅں میں غرور و تکبر، ضرورت سے زیادہ خوداعتمادی اور خودپسندی ہوتی ہے۔ جوزا اور اسد کی جوڑی بظاہر بڑی شان دار نظر آتی ہے، دونوں ایک دوسرے کے لیے بڑی کشش رکھتے ہیں۔ اسد کے شاہانہ انداز اور طور طریقے ”جڑواں بچے“ کو بہت لبھاتے ہیں اور باوقار مگر گلیمر کا دل دادہ اسد شوخ و حاضر جواب جوزا کی ذہانت سے جلد متاثر ہوتا ہے۔ اگر یہ شراکت کاروباری معاملات تک رہے تو بڑی فائدہ مند ثابت ہو سکتی ہے، البتہ ازدواجی زندگی میں یہ دونوں جذباتی طور پر ایک دوسرے کے لیے زیادہ بہتر رفیق ثابت نہیں ہوتے۔ دراصل اسد کی محبت اور جذبات دل کی گہرائی سے تعلق رکھتے ہیں جب کہ جوزا کی محبت پر بھی اس کا دماغ حکمران ہوتا ہے اور وہ جذباتی تعلقات میں بھی غور و فکر کیے بغیر آگے قدم نہیں بڑھاتا۔ چناں چہ جوزا کے تاخیری حربے اور بہانہ بازی اسد کو مشتعل کر سکتی ہے۔ دوسری طرف جوزا کو یہ شکایت ہو سکتی ہے کہ اس پر مکمل غلبہ حاصل کرنے کی کوشش کی جا رہی ہے اور وہ ایک محدود زندگی نہیں گزار سکتا۔ بہرحال اگر دونوں ایک دوسرے کو سمجھنے کی کوشش کریں اور مصالحانہ انداز اپنائیں تو یہ ایک مفید رفاقت ہوگی۔

جوزا اور سنبلہ کا ساتھ

جوزا کاعنصر ہوا اور سنبلہ کا مٹی ہے۔ دونوں کے عناصر میں مخالفت موجود ہے۔ علم نجوم کے قواعد کے مطابق بھی دونوں کے درمیان ناموافق زاویہ نظر موجود ہے۔ سنبلہ شخصیت اپنی مثبت خصوصیات میں اصول و ضابطے کی پابند، معقولیت پسند، تجزیہ کرنے کی عادی، کچھ پُراسرار اور نفاست پسند ہوتی ہے جب کہ اس کی منفی خصوصیات میں تنگ نظری اور غیرلچک دار رویے، عیب جوئی اور بہت زیادہ تنقید وغیرہ شامل ہیں۔ جوزا اور سنبلہ ایک ہی سیارے عطارد کے ماتحت ہیں لیکن دونوں ایک دوسرے سے بالکل مختلف ہیں۔ عام تعلقات میں گمبھیر اور سنجیدہ مزاج سنبلہ، جوزا کو اس کی تیز فہمی، خوش طبعی، خوش گفتاری اور خوش فعلی کے سبب پسند کرتا ہے اور اس کی صحبت میں فرحت و تازگی محسوس کر سکتا ہے، مگر دو قدم ساتھ چلنے کے بعد ان کے بنیادی اختلافات اور تضادات ابھر کر سامنے آنے لگتے ہیں۔ سنبلہ افراد عملی سوچ رکھتےہیں اور مفروضات پر یقین نہیں کرتے ہیں جب کہ جوزا بیشتر وقت ایک خیالی دنیا میں بسر کرتا ہے۔ امن پسند سنبلہ کو تبدیلی اور انقلاب وغیرہ سے کوئی خاص دل چسپی نہیں ہوتی لیکن ہوا کے دوش پر سوار جوزا کے نزدیک جب تک متواتر تغیر اور تبدل نہ ہوتا رہے جینے میں کوئی مزہ ہی محسوس نہیں ہوتا۔ سنبلہ کو حسن ترتیب اور نفاست بہت عزیز ہے اور جوزا کا خانہ ان دونوں خوبیوں سے یکسر خالی ہے۔ سنبلہ زودرنج ہے۔ جوزا کو غصہ آجائے تو اس کی زبان نہایت تندوتلخ ہو جاتی ہے۔ جوزا کو بھی سنبلہ کی رفاقت خوش گوار لگ سکتی ہے، مگر صرف تھوڑے عرصے کے لیے، لہٰذا اس تعلق سے گریز ہی بہتر ہے۔

جوزا اور میزان کا ساتھ

دونوں کا عنصرہوا ہے، لہٰذا عنصری خصوصیات یکساں ہیں۔ علم نجوم کے قواعد کے مطابق جوزا سے پانچواں برج میزان ہے جو محبوب کے لیے مخصوص ہے اور میزان سے جوزا کا نمبر نواں ہے جو مستقبل کی منصوبہ بندی کا خانہ ہے، لہٰذا دونوں کے درمیان موافقت کا شان دار زاویہ موجود ہے۔ میزان شخصیت کے مثبت پہلو مصلحت اندیشی، شائستگی اور سلیقہ، توازن اور انصاف پسندی، ذہانت اور دل کشی اور ہوشیاری ہے جب کہ منفی پہلو سہل روی اور کاہلی، تذبذب، خودغرضی اور بے ثباتی وغیرہ ہیں۔ جوزا اور میزان کا تعلق ایک حسین رفاقت میں ڈھل سکتا ہے۔ جوزا کی توانائی کا مسلسل بہاﺅ اور میزان کا اختراع پرداز دل کشی کی یکجائی بہت دل چسپ ہو سکتی ہے۔ میزان جوزا کو ذہنی چیلنج فراہم کر سکتا ہے جس کی جوزا کو ضرور ہے۔ میزان میں وہ نزاکت اور عشوہ گری نیز معاملہ فہمی اور موقع شناسی ہے جو جوزا کو سنبھالنے کے لیے ضروری ہے۔ جوزا کو میزان کے کسی منصوبے پر کام کرنا بہت دل چسپ اور خیال آفریں لگتا ہے۔ جوزا اور میزان دونوں آپس میں دنیا کے ہر موضوع پر لمبی چوڑی گفتگو کریں گے، البتہ کسی فیصلے پر پہنچنے کے عمل میں ایک دوسرے سے اختلاف کر سکتے ہیں۔ میزان جوزا کی غیرضروری باتوں کو الگ چھانٹ کر ایک توازن قائم کر سکتا ہے، البتہ جوزا کی بہ نسبت وہ کوئی فیصلہ کرنے میں بہت وقت لے سکتا ہے جب کہ جوزا ایک لمحے میں فیصلہ کرتا ہے۔ بہرحال یہ ایک دل چسپ اور پُرلطف جوڑی ثابت ہو سکتی ہے۔

جوزا اور عقرب کا ساتھ

جوزا کا عنصر ہوا اور عقرب کا پانی ہے۔ دونوں کے عناصر کے درمیان کوئی تعلق خاطر نہیں۔ یہی صورت علم نجوم کے قواعد کے مطابق بھی ہے۔ عقریب شخصیت کے مثبت پہلو حوصلہ مندی، حساسیت، خوداعتمادی، مصلحت پسندی اور ہوشیاری ہے جب کہ اپنی منفی خصوصیات میں یہ تسلط پسند، حاسد، طنزکرنے والا، بے رحم، پُرتشدد اور مغرور ہوتا ہے۔ جوزا اور عقرب کی آپس میں مشکل ہی سے نبھے گی، کیوں کہ طاقت اور اختیارات کے متلاشی عقرب اور طفلانہ سیر و تفریح کے دل دادہ جوزا کے درمیان کوئی مطابقت ہی نہیں ہے۔ عقرب، جوزا کو متلون مزاج اور طفل مکتب سمجھتا ہے۔ جوزا، عقرب کی گمبھیرتا اور گہری سنجیدگی سے خائف ہو سکتا ہے۔ عقرب شخصیت غیرمعمولی حاکمیت پسند، ہر معاملے میں انتہائی سنجیدہ ہوتی ہے۔ یہ لوگ کبھی کوئی کام ادھورا نہیں چھوڑتے اور ہر قیمت پر اسے پورا کر کے دم لیتے ہیں۔ جوزا جو آزادی کے متوالے ہوتے ہیں، وہ کسی ایسے کام میں دل چسپی نہیں لیتے جسے منطقی انجام تک پہنچانے میں لمبا وقت درکار ہو۔ ان کے لیے تو یہ بہت ہی کوفت اور بوریت کی بات ہو سکتی ہے۔ یہ دونوں بروج ہر پہلو سے ایک دوسرے سے اتنے مختلف ہیں کہ کبھی ایک عمدہ جوڑی نہیں بن سکتے۔

جوزا اور قوس کا ساتھ

جوزا کا عنصر ہوا اور قوس کا آگ ہے۔ دونوں ایک دوسرے کے معاون ہیں۔ علم نجوم کے قواعد کے مطابق دونوں مقابل کے برج ہیں، یعنی دونوں ایک دوسرے سے ساتویں نمبر پر واقع ہیں اور ساتواں خانہ شراکت و تعلقات سے متعلق ہے۔ ایک قوس شخصیت اپنے مثبت پہلوﺅں میں بے خوف اور صاف گو، باحوصلہ، متجسس اور فطرت پسند ہوتی ہے، جب کہ اس کی منفی خصوصیات میں شیخی، تشدد، ضرورت سے زیادہ خوداعتمادی، مبالغہ آرائی، بے اصولی، حماقت اور اکھڑپن شامل ہے۔ جوزا اور قوس ایک بھرپور اور مکمل جوڑی ہے۔ جوزا تیزگام ہے اور معاملات کو ہلکے پھلکے انداز میں لیتا ہے۔ قوس خوش خرم ہے اور معاملات کو بہت تیزی سے اپنے کنٹرول میں لے لیتا ہے۔ دونوں ہی تفریح پسند، انتہائی ذہین، نڈر اور بے باک ہیں۔ قلیل المیعاد تعلقات کے لیے یہ ایک زبردست جوڑی ہے لیکن طویل عرصے کے لیے یہ تعلق دھماکا خیز بھی ہو سکتا ہے۔ قوس گرم جوش، پُرخلوص، نظریاتی اور انتہائی محرک ہوتا ہے۔ جوزا ان تمام خوبیوں کو پسند کرتا ہے۔ جوزا میں تیزی طراری، چالاکی، دل آویزی اور کسی بحران میں بھی پُرسکون رہنے کی صلاحیت ہوتی ہے اور قوس ان خوبیوں کا خواہش مند ہوتا ہے، البتہ قوس میں جوزا کا طنز برداشت کرنے کی صلاحیت نہیں ہوتی۔ دونوں کی رفاقت یقینا بے حد اثرآفریں ہو سکتی ہے۔

جوزا اور جدی کا ساتھ

جوزا ہوا اور جدی کا عنصر مٹی ہے۔ دونوں کے عنصر مخالف ہیں۔ علم نجوم کے قواعد کی رو سے دونوں میں کوئی موافق زاویہ¿ نظر نہیں ہے۔ ایک جدی شخصیت امن پسند اورکارگزار، مستقل مزاج، خاموش طبع، بلند کردار، محتاط اور منطقی سوچ کی حامل ہوتی ہے، جب کہ اپنی منفی خصوصیات میں شکی مزاج، سردمہر اور خودغرض، مزاحمت کرنے والی، یاسیت پسند، ضدی اور جلد برا ماننے والی ہے۔ جوزا اور جدی کا اتحاد، کوئی نیک شگون نہیں ہے۔ جدی کو ایک ٹھوس تعلق کی ضرورت ہوتی ہے اور جوزا میں بہت ہلکا پن، تلون اور ناپائیداری نظر آتی ہے جو جدی کے احساسات اور جذبات کو سرد کر سکتیہے۔ جوزا کو جدی میں بہت سستی اور سنجیدگی نظر آتی ہے، لہٰذا یہ جوڑی نامناسب رہتی ہے، تاہم جوزا کو جدی کی رفاقت میں سکوت حاصل ہو سکتا ہے، مگر بہت قلیل عرصے کے لیے۔ جدی جوزا کی گہرائی کا اندازہ نہیں کر سکتا اور اس کے بھیدوں کو بھی کبھی نہیں پا سکتا۔ جدی کے پاﺅں زمین میں گڑے ہیں۔ وہ ہواﺅں میں اُڑنے والی اس جڑواں مخلوق کو کبھی نہیں سمجھ سکتا۔ جدی کم آمیز اور خاموش طبع ہے جب کہ جوزا گپ باز ہے۔ وہ خیالوں کی دنیا میں رہتا ہے۔ جدی چٹان کی طرح ایک ہی جگہ جما رہتا ہے۔ دونوں ایک دوسرے سے یکسر مختلف ہیں، لہٰذا ان کی رفاقت دیرپا نہیں ہو سکتی۔

جوزا اور دلو کا ساتھ

دونوں کا عنصر ہوا، علم نجوم کے قواعد کے مطابق دوستی اور موافقت کا زاویہ نظر رکھتے ہیں۔ ایک دلو شخصیت کے مثبت پہلو دیانت داری اور سچائی کی تلاش، نرم دلی اور ہمدردی، تخلیقی خصوصیات، کشادہ ذہنی، ہر دل عزیزی اور ملنساری ہیں، جب کہ منفی پہلو متلون مزاجی اور نرالے انداز، تغیرپذیری، بغاوت، وہم وغیرہ ہیں۔ یہ صحیح معنوں میں ایک انتہائی شان دار، پُرجوش اور دل چسپ رفاقت ہوگی۔ دلو کی بے مثال کارکردگی جڑواں بچے(جوزا) کو یقینا سحرزدہ کر سکتی ہے۔ وہ ہمیشہ جوزا کو اپنی طرف متوجہ رکھ سکتا ہے۔ دونوں ہی شدید نٹ کھٹ اور تھوڑے سے سنکی ہیں۔ دل کے معاملے میں دونوں محبت کے کھیل کو بڑی خوبی سے جاری رکھ سکتے ہیں۔ یہ ملاپ مقناطیسی ہے۔ دونوں بروج تصور پرست ہیں اور مستقل اس دنیا سے دور دوسرے جہانوں کی سیر کرتے رہتے ہیں اور جو مناظر دیکھتے ہیں ان پر مستقل انگشت بدنداں رہتے ہیں۔ کبھی کبھی سستانے کے لیے اس دنیا میں آجاتے ہیں۔ ایک دوسرے کی آنکھوں میں جھانکتے ہیں اور ایک بار پھر انجانے جہانوں کی سیر کے لیے پرواز کر جاتے ہیں۔ جی ہاں! یہ سچ ہے کہ یہ دونوں مٹر کی پھلی ہیں دو دانوں کی طرح ایک جیسے ہیں، لیکن ان میں چند بنیادی فرق بھی ہیں۔ دلو ضدی ہے اور کبھی کبھی مشکلات کھڑی کر سکتا ہے، دونوں ہی بے انتہا تغیر پذیر بھی ہیں۔ یہ دونوں مل کر جتنی آسانی سے کما سکتے ہیں، اتنی ہی آسانی سے اُڑا بھی سکتے ہیں۔ بہرحال یہ ایک خوش گوار رشتہ ہے۔

جوزا اور حوت کا ساتھ

جوزا کا عنصر ہوا اور حوت کا پانی ہے۔ دونوں میں کوئی ربطِ خاص نہیں ہے۔ علم نجوم کے قواعد کے مطابق ان کے درمیان مخالفت کا زاویہ¿ نظر موجود ہے۔ حوت شخصیت کے نمایاں پہلو یہ ہیں: حساس اور آزاد فطرت، نرم دل اور خیال کرنے والا ترقی پسند، تخیلاتی، فطرت کا شائق اور کم آزاد، جب کہ اس کی منفی خصوصیات میں مبہم اور غیریقینی کیفیات، سست روی اور بے پروائی، الجھا ہوا انداز، غیرعملی اور کبھی کبھی عدم توازن شامل ہیں۔ آبی مچھلی(حوت) کو ہوا کے دوش پر سوار شوخ و شریر جوزا بہت دل چسپ اور پُرجوش لگے گا اور جوزا کو یہ مچھلی حد سے زیادہ حساس لگے گی۔ جوزا شخصیت مجلسی اور حوت خلوت پسند ہے۔ دونوں ایک دوسرے کو دِق کر سکتے ہیں۔ دونوں ہی اپنی رو میں بہنے والے اور مسائل سے کترا کر بہت عمدگی سے نکل جانے والے ہیں۔ اگر دونوں ایک ہی دھارے میں بہنے کا آغاز کریں تو خطرناک نتائج لازمی ہیں۔ جوزا حوت کو سمجھنے اور تجزیہ کرنے کی کوشش میں اسے مکمل طور پر برباد کر سکتا ہے لیکن اس آبی مخلوق کو سمجھنا اس کے لیے قطعی ناممکن ہے۔ تاہم یہ دونوں باذوق ہیں اور دنیا کی عمدہ چیزوں کا شعور رکھتے ہیں اور یہی قدرِ مشترک دونوں کو ایک دوسرے سے قریب لانے کی موجب ہوتی ہے۔بہرحال یہ کوئی ٹھوس بنیادیں نہیں ہیں، جن پر شراکت کا عظیم الشان قلعہ تعمیر کیا جائے

[/c]