Kis qadar zulm dhaya karte ho
Yeh jo tum bhool jaya karte ho
Kis ka ab haath rakh ke seene per
Dil ko dharkan sunaya karte ho
Hum jahan chaye peene jate thay
Kia wahan ab bhi aaya karte ho
Kon hai ab ke jis ke chehray par
Apni palkon ka saaya karte ho
Kyun mere dil main rakh nahi dete
Kis liye gham uthaya karte ho
Phone per geet jo sunate thay
Ab woh kis ko sunaya karte ho
Akhiri khat main usne likha tha
Tum mujhe yaad aaya karte ho
Wasi Shah