اوروں کا تھا بیان تو موجِ صدا رہے
خود عمر بھر اسیرِ لبِ مدعا رہے
مثلِ حباب بحرِ غمِ حادثات میں
ہم زیرِ بارِ منتِ آب و َہوا رہے
میں اُس سے اپنی بات کا مانگوں اگر جواب
لہروں کا پیچ و خم وہ کھڑا دیکھتا رہے
ق
گلشن میں تھے تو رونقِ رنگِ چمن بنے
جنگل میں ہم امانتِ بادِ صبا رہے
سُرخی بنے تو خونِ شہیداں کا رنگ تھے
روشن ہوئے تو مشعلِ راہِ وفا رہے
اُبھرے تو ہر بھنور کا جگر چاک کر گئے
ٹھہرے تو موج موج کو اپنا بنا رہے
امجد درِ نگار پہ دستک ہی دیجئے
اس بے کراں سکوت میں کچھ غلغلہ رہے
