CHALO TUMKO BATATE HAIN
Chalo tum ko batate hein
Ke tum ko dekh kar dil ne
Kaha tum rishta-e-jan se bhi barh kar ho
Dua ki sarhadon par
Jo adhoori hai ,meri aisi tamanna ho
Mere dil ka mukaddar ho
Ke tum ik roshni ban kar ,shafa le kar
Kabhi dast-e-masiha ki tarah
Utre huey , har zakhm-e-dil par ho
Chalo tum ko batate hein
Ke tum iman hamara ho
Sara-e-dehar mein andesha-e-zindagani mein
Tumhi dil ka sahara ho
Jo rooh ke aasman pe jagmagaya hai muhabbbat se
Suhani sham ki chahaton ka pehla tara ho
Wafa ka ista-ara ho
Tumhare kurb ki kushboo se pathar ki tarah hum ne
Sulagti dhoop mein phelao paya hai
Tumhare pyaar ke rangeen kanwal thandi hawa se
Sarsarate hein
Hum sawan mein bheege pairon ko choo lein to
Tumhare lams ki khusboo ke lamhe jagmagate hein
Chalo tum ko batate hein
Ke hum ne zindagi ke sab warq le kar
Sab hi satron mein likh li tamanna tum ko pane ki
Zamane bhar mein shayad katib-e-taqdeer ke hathon
Mere dil ne likh li hai tumhari chah ki khwahish
Tumhari aarzoon ka jo ik idraak hai mujh mein
Kisi mein ho nahi sakta
Tumhari muskurahat ka ik armaan hai mujh mein
Kisi mein ho nahi sakta
Chalo tum ko batate hein
Chalo tum ko batate hein
